桃桃帶你遊世界~深圳觀瀾湖~交通及酒店設施篇 | hutchgo blog

桃桃帶你遊世界~深圳觀瀾湖~交通及酒店設施篇

Author: 桃媽
April 18, 2019

電力驚人嘅阿桃,早就將香港玩得七七八八,今次襯桃爸有假期,隨性去一個短途小旅行!澳門去過太多次,而且自己單拖都冇問題!

今次有男人同行,決定向北殺上去,去渡假天堂觀瀾湖過2日1夜!

相信唔少人同我一樣,對於帶小朋友北上番深圳都有一定顧慮,但今次旅程非常舒適。

由於皇崗口岸會有直通程到酒店,所以住九龍嘅桃家就出到太子搭直通車,成人$41,3歲以下嘅阿桃唔駛錢。

到埗先過完香港境再憑車飛上車去皇崗口岸過埋中國境,值得一提嘅係小朋友需要帶齊身份證、回鄉證同Passport!

由太子到皇崗只需要1小時(包埋過關),超級方便呀!之後就可以到關口嘅17號鋪等接駁車,但記得要預先係訂房時預約埋接駁車時間呀!

大概30~45分鐘車程就到達目的地~深圳觀瀾湖酒店啦!酒店大堂寬敞舒適,完全就係嚟度假嘅感覺!

係我搞緊check-in時,酒店職員見到阿桃仲即刻泵左兩個汽球俾佢玩,kids friendly都不得了!

原先對觀瀾湖嘅印象只係高爾夫聖地,但原來已經逐漸轉型做親子渡假聖地啦,最簡單睇間房就知啦!

呢間親子房最吸睛當然係張兒童床啦,阿桃全晚係度爬上又爬落

雖然冇滑梯,但都有準備到玩具俾小朋友玩

仲有個佈滿豆豆梳化嘅reading corner添,睡前故事都準備埋俾你!

親子房就當然照顧周到啦,小朋友需要嘅牙刷、沖涼液、浴袍、櫈仔都一應俱全,連花灑位都專登較矮d方便小朋友用架!

去酒店當然唔少得浸浴缸啦!

出面仲有個露台

個景仲幾靚添

酒店總共有4間兒童房,每間房都唔同特式,除左我地住嘅太空主題,仲有海洋、糖果、森林主題房,有興趣嘅記得預早book,因為超搶手呀!

酒店設施當然唔少得游池啦

呢度更加有2個室外泳池, 分成酒店同會所泳池,但住客係可以用哂2個泳池架!

仲少有地有提供水泡,咁大家帶小朋友嚟玩就咁帶泳衣就ok啦!(仲有浮條同小bb上膊頭嘅水泡添)

可惜我地去時仲未夠熱,只可以去浸下腳

玩到攰可以曬下太陽休息下

環境都好正,唔游水都可以過嚟影下相

健身房對正泳池,超好view

另一邊園景仲有個吊床,有哂蚊帳咁

一家人影張相休息下都唔錯架

酒店入面仲有個康樂中心,除左有小朋友勞作做之外

呢個室內兒童遊樂場都係免費架!

雖然唔算大,但都有唔少野玩架

彈床可以俾小朋友喪放電

場外仲有動力沙玩

仲有d機動小遊戲玩

下晝我地去左酒店餐廳【山景閣】食飯,環境相當優美,對正泳池景,自助早餐都會係呢度食架

午餐以點餐為主,價錢唔算貴,而且全部都有配湯

韓式薄牛肉飯配麵豉湯及泡菜 ¥68

馳名海南雞飯配雞油飯及雞雜湯 ¥82

雞肉好嫩但雞皮好爽口,而且仲去骨

雞雜湯,雞味濃郁,配雞油飯食更香

福建鮑魚海鮮燴飯配燉湯 ¥118

真係有大大隻鮑魚架!

交通同酒店方面介紹完畢,下篇我地就出發去距離酒店僅5分車程嘅【新城】繼續大玩特玩!

我地係官方渠道買package,俾出面賣得更抵架!

#寫出你遊歷 #說走就走 #親子遊

Spread the love

About the author

Leave a reply

You must be logged inlogged in to post a comment.