[日本] 七日北海道名古屋遊 探索薰衣草花田 | hutchgo blog

[日本] 七日北海道名古屋遊 探索薰衣草花田

Author: Jacky
July 24, 2018

小篇今年都去咗好幾次日本,去過沖繩、廣島四國、東京、福岡,嚟到六月正值花開旺季,梗係要慕名去薰衣草田玩吓啦!可惜網上嘅遊記好多都係自駕遊,而我又未有國際車牌,唯有用當地交通傲遊北海道!

 

Day 1 (23/6)香港- 台北- 名古屋

航班:香港國際機場(HKG) – 臺灣桃園國際機場 (TPE)

臺灣桃園國際機場 (TPE) – 名古屋中部國際機場(NGO)

時間:5hr 50min

因為航班要喺台北落一落機所以總共要搭5hr 50min先到名古屋

 

坐0850早機,晨早留留要到香港機場,仲要坐早機,飛機餐都唔慌飽啦!所以識玩一定係帶埋信用卡,拎埋機票入plaza premium lounge食早餐啦:P 當然唔少得呢碗魚蛋粉,望見都流晒口水喇!

HKG Plaza Premium

食飽就上機訓陣嚕Zzz……

飛左一個鐘鬆啲話咁快就到台北桃園機場,因為要清機緣故所以比人趕咗落機過安檢等上機。雖然成個轉機過程都係15分鐘左右,但梗係唔好晒咗呢個機會,一於再入台北間plaza premium lounge再食過,哈!

TPE Plaza Premium

香港間lounge就出名食魚蛋粉,嚟到台北,梗係唔少得肉燥飯啦!TPE Plaza Premium

唔好睇佢賣相平平無奇,食完真係番尋味!食飽又趕上機,睇多套戲就差唔多落機嚕!

一到埗就坐名鐵特急出名古屋駅市區,轉車去到榮站再去dormy inn擺低行李。酒店會住2晚。

休息一陣就去咗榮站嘅Central Park同埋Oasis 21廣場周圍行吓。

Central park

晚飯去咗食德兵衛,係間又高質又平嘅迴轉壽司:P 店內都見到好多香港人,睇嚟呢間野都幾得香港人鍾意!最後2個人食左3800円左右就捧住個肚去埋單嚕!

NGO sushiNGO sushi 2

食完晚飯去咗附近間驚安之殿堂買吓零食手信,又去咗名古屋電視塔附近散吓步咁,幾寫意!不過我就無上到去電視塔,唔知道上去睇夜景會係點樣嘅呢?

 

Day 1總結:

早餐:HKG Plaza Premium Lounge

午餐:TPE Plaza Premium Lounge

晚餐:德兵衛(人均1500-2000円)

住宿:Dormy Inn (人均HKD$378)

 

Day 2 (24/6)名古屋

尋日又早起又坐咗成日機,呢日訓晏少少11點先出門。

朝早去咗名古屋駅搵拉麵,味噌湯底好入味,食到最後有少少咸但係值得一試!

nikimaru ramen

然後就出發去名古屋城,逛逛城內周圍感受宮殿堂皇氣派,如果遇上周末或者節日嘅話,仲可以係二之丸廣場欣賞織田信長、德川家康等戰國武將嘅真人扮演!

NGO city 4NGO city 1NGO city 3NGO city 2

睇完名古屋城都3點幾嚕,坐返出去名古屋駅行街shopping!名古屋駅周邊都係購物商圈,有名鐵百貨店、近鐵Passe、JR gate tower,當然唔少得Bic Camera啦!仲可以去地下街搵搵嘢食,當係下午茶填吓個肚又得!

行完商場臨近傍晚,一於就追住個夕陽睇日落!睇日落地點極力推薦榮站外面Oasis 21嘅水の宇宙船!免費入場之餘人流唔會太多,場內水池播放輕鬆音樂,但係上面仲可以望到日落背景嘅電視塔,望見咁靚嘅景幾咁令人陶醉呀!

NGO sunsetNGO sunset 1

睇完日落肚餓了,去噚日間驚安殿堂附近嘅じゃんじゃん亭食燒肉放題,店內用智能平板點餐,咁就唔怕言語不通嘅問題啦!

NGO Teppanyaki

Day 2總結:

午餐:力丸拉麵(人均1000-1500円)

晚餐:じゃんじゃん亭栄店(人均2700-3000円)

住宿:Dormy Inn (人均HKD$378)

 

Day3 (25/6)名古屋- 札幌

第三日係舟車勞頓日,但如果唔怕chur嘅話仲可以去埋熱田神宮欣賞祭典活動!

朝早起身執埋行李check out 搞搞吓就11點了,喺酒店附近搵到間食傳統會席料理嘅太閤本店,賣相唔錯,不過味道普通,不過不失咁啦!

NGO lunch

食飽就搭去名古屋駅再坐返出機場,準備飛去札幌啦!

航班:名古屋中部國際機場(NGO) – 札幌新千歲機場(CTS)

時間:1hr 40min

一到新千歲機場已經即刻感受到北海道嘅涼意!名古屋上機明明仲係28-29度,呢度落機即刻降到18度!拎完行李就去JR遊客服務中心買定JR交通車票。因為嚟梗幾日會去札幌、小樽同美瑛,三地相隔都有一段距離,但又未至於要去買JR pass,所以原本想買四張單程車票,最後去請教職員點買最抵!

去到咁啱有個識講廣東話嘅職員當值,講完我地嘅行程之後佢推介咗我地買「富良野.美瑛鐵路車票」。車票票價6500円,比起買單程車程慳咗4000幾円! 呢張車票玩法包含車票A同車票B,車票A係比你由札幌入閘,上特急JR自由席搭去旭川,然後轉富良野線出閘。

車票B就包你喺自由乘降區間列車無限次乘搭自由席,即係無限次來回旭川<->美瑛<->富良野。而車票B亦都包含一次單程回札幌,即係旭川返札幌嘅特急車自由席。除咗呢張車票之外仲有好幾種優惠車票比唔同行程安排嘅遊旅客,所以大家去美瑛富良野睇薰衣草花田嘅話記住要去JR中心問問呢啲優惠車票喇!

TicketTicket 2

另外仲買咗張來回札幌<->小樽嘅JR車票,喺Day 4, 5來回小樽會用到嘅!

買完車票之後坐JR快速機場線出札幌市區,再轉地鐵去中島公園駅附近嘅Vessel Inn Sapporo擺低行李,住一晚。

到酒店擺完行李已經開始天黑,係時候食晚飯喇。嚟到北海道又點少得食蟹呢!

膽粗粗咁去咗えびかに合戦(蝦蟹合戰)食蟹宴放題,因為第一次試,所以叫咗個7500円嘅放題餐,呢個餐包括原隻毛蟹、皇帝蟹腳、松葉蟹腳、蝦天婦羅、蟹腳天婦羅、蝦壽司、蟹壽司、蝦天婦羅壽司同埋茶碗蒸!

Ebikani menuEbikani

一睇就知成個放題嘅重點係毛蟹、皇帝蟹腳同松葉蟹腳啦!所以壽司天婦羅果啲真係食1 round就夠,不過蟹腳天婦羅幾特別,都值得一試嘅!

Ebikani2

皇帝蟹腳勁粗,多肉到一啖都食唔晒,好juicy!至於毛蟹,肉唔多,但勝在蟹膏鮮甜!最正嘅一定非松葉蟹腳莫屬啦!蟹腳都好粗,而且好易就拆到蟹殼,所以成晚基本上主要係食松葉蟹嘅!

呢盆蟹要食晒先可以refill,總共食咗3 round已經飽到上心口……成世人第一次食咁多蟹仲要咁好食,真係痛快!

 

Day 3總結:

午餐:太閤本店伏見店(人均1500-2000円)

晚餐:えびかに合戦(人均7000円)

住宿:Vessel Inn Sapporo Nakajima Park (人均HKD$318)

 

Day 4 (26/6)札幌- 小樽

嚟到北海道行程變返緊湊啲,9點鐘出門口checkout寄存行李,然後就去二条市場食個豐盛早餐!

去到二条市場先去「大磯」食海鮮丼填飽個肚,除咗海膽鮮甜之外,值得推薦嘅係味噌燒銀鱈魚,嫩滑多汁,搭配味噌淡淡咸香,而家諗返起都流口水!

Sapporo sashimi rice

食完海鮮丼,又點少得食雪糕呀?大磯收銀處都有自家製軟雪糕賣,奶味濃郁雪糕滑,不過見咁多人排隊,所以買完出門口食!

Sapporo sashimi rice ice cream

行行吓見到一檔賣夕張蜜瓜,可以坐入店內食,蜜瓜肉腍甜到爆,一定要試!

Melon

填飽個肚之後就去探索札幌,喺市區周圍逛逛,由大通公園影完札幌電視塔開始,經札幌市鐘樓,行去北海道廳舊本廳。

Sapporo Central ParkHokkaido old parliament

行到咁上吓開始肚餓,去雪印パーラー(雪印Parlor) 食北海道最頂級嘅雪糕,極力推薦雲呢嗱味芭菲,雪糕入口即溶,濃醇綿滑,實在太好味,所以最後回程返嚟北海道又食多次!

Parlor Parlor 2

食完之後狸小路商店街行街,呢條大街集合飲食、藥妝、服飾、娛樂於一身,好啱遊客行架!

行完之後就出返酒店拎行李去札幌駅,搭JR函館本線去小樽~

去到小樽Hotel Torifito Otaru Canal安置行裝住返一晚。擺埋行李就去壽司醫吓個肚,小樽市海產豐盛,當地嘅壽司店林林總總。最後俾我地搵到間迴轉壽司和樂,選擇多,海產新鮮得嚟價格相宜,店內有唔少本地人排隊,不過廣東話都不絕於耳,睇嚟呢間壽司店都幾受香港人歡迎!

Otaru sushiOtaru sushi 2

食完之後喺小樽市區周圍逛逛,最唔少得當然係小樽運河,感受吓小樽嘅浪漫氛圍。然後返酒店浸個熱溫泉,疲勞盡消!

Otaru canal

Day 4總結:

早餐:二条市場大磯(人均3000円)

午餐:雪印パーラー(人均1000円)

晚餐:迴轉壽司和樂(人均1500-2000円)

住宿:Hotel Torifito Otaru Canal (人均HKD$481)

 

Day 5 (27/6)小樽- 美瑛

晨早起床又checkout寄存行李嚕。今朝早餐嚟到三角市場覓食!

Otaru market

三角市場只有一條直街,直行2分鐘其實已經行完。行到最尾綱岸水産個老闆招手歡迎,向我地介紹店內最鮮活蟹!有帝王蟹、松葉蟹、毛蟹同花咲蟹。前日食過蟹放題已經食盡帝王松葉同毛蟹喇,所以今次一於試食花咲蟹。

Otaru crab 1

由於呢檔同さんかく亭有合作,所以我地揀完蟹之後就叫我地去さんかく亭等20分鐘。

當然,肚餓嘅我地喺店內都叫咗魚生飯、燒貝同燒銀鱈魚,水準都唔比大磯差喎!

Otaru sashimi fishOtaru sashimi

食完飯就啱啱煮好蟹,開動!花咲蟹肉唔算多,但食落非常鮮甜,蟹膏一啲都唔腥,食完仲飲埋剩低嘅湯汁精華,好滿足!

Otaru crab 2

食飽就去堺町通行街,成條街有好多間店賣玻璃擺設飾物,同埋小樽獨有嘅手信。

Otaru glass street

行到中間入咗間拉麵店(ラーメンみそら)充充飢,店內牆上掛上Bigbang成員嚟幫襯之後嘅親名簽名海報,難怪店內有唔少韓國遊客幫襯!

Otaru ramen

食完之後去LeTao嘅旗艦店睇吓手信,肚仔仲有空位可以坐低食個蛋糕,同埋買手信返香港!

Otaru Letao

堺町通行到尾去北一硝子館到此一遊,入面仲係用梗油燈照明,喺度坐低食個茶點都幾chill架!

Otaru black cafe

行完之後返酒店拎行李去小樽駅,準備出發去美瑛嚕!

Otaru station

先由小樽搭JR去札幌,再轉JR特急去旭川,再轉車去美瑛駅。三程加埋都搭咗三個幾鐘……所以到埗都已經夜晚9點幾,咩舖頭都閂晒了。美瑛周圍都好靜,街上面幾乎一個人都無。

Biei station

去Hotel Lavenir check in之後行返出去7-11買晚飯返酒店食。

 

Day 5總結:

早餐:三角市場さんかく亭(海鮮丼人均2000円,蟹另計價錢)

午餐:ラーメンみそら(人均1000円)

晚餐:7-11(人均500 円)

住宿:Hotel Lavenir (人均HKD$530含早餐)

 

Day 6 (28/6)美瑛- 札幌

Day6終於嚟到成個trip嘅行程重點,睇薰衣草花田!

晨早起床食酒店早餐,酒店buffet早餐都有幾多選擇,而且都幾高質!值得推介嘅係薯仔沙律同埋美瑛當地新鮮牛奶!今餐要食飽啲當係brunch,因為出富良野未必有時間再搵嘢食了!

Biei breakfastBiei breakfast 2

食完早餐checkout 寄存行李。然後出發去睇薰衣草花田!由於6月尾仲未到薰衣草開花旺季,所以坐去薰衣草花田都只係見到一望無際嘅綠色草原~

Biei greenyard

但如果正值7月旺季嚟嘅遊客一定要睇準時間表嚟坐「富良野.美瑛慢車號」慢慢欣賞呢一大片嘅薰衣草海!仲有可以留多日踩單車遊拼布之路!

Lavender farm station

由美瑛搭到去ラベンダー畑駅落車,跟住人潮行到去富田農場,終於可以見到一大片薰衣草花海!除咗薰衣草之外,仲有其他唔同顏色嘅花種俾大家打卡!隔離仲有間店賣薰衣草味雪糕,比大家拎住雪糕打卡呃like!六月嚟已經咁靚,真係想像唔到7月旺季嚟係點既樣!雖然話唔係旺季,但係人潮都唔少,要搵個靚位影文青相都唔易架!

Farm tomita 2Furano park 2

喺富田農場影完相,行去中富良野買張觀光車上山,飽覽呢整片富良野市!上到山轉左,會發現有一大片好少人留意到嘅薰衣草花園,終於可以瘋狂影相啦!

Naka Furano Cable car ticketNaka Furano Cable carNaka Furano Lavender

玩完薰衣草花田就要打道回府,攞齊行李坐返出札幌喇!

之前去過雪印パーラー食雪糕仲念念不忘,所以當日坐返出市區就衝返去食雪糕。當日仲要遇正6月28日係芭菲日,特定芭菲都係800円一杯,超抵食!

Parlor 4

然後去Sapporo Park Hotel擺低行李住返晚。擺完行李都已經9點幾10點,最後一晚決定去食牛角燒肉放題!

日本牛角放題比起香港嘅多好多款,而且款式仲高級好多!最後揀咗個Deluxe放題餐食豪佢!

Gyukaku 1Gyukaku

Day 6總結:

早餐:Hotel Lavenir酒店早餐

小食:富田農場雪糕(300円)

晚餐:牛角札幌駅前店(人均4500-5000円)

住宿:Sapporo Park Hotel (人均HKD$484)

 

Day 7 (29/6)札幌- 名古屋- 香港

最後一日主要都係回程返香港。

晨咁早checkout拎埋行李出新千歲機場坐返名古屋。新千歲機場大堂有極多間手信店,可以嘅話可以預早半個鐘至1個鐘嚟行吓買手信!然後就上飛機搭去名古屋了~

航班:札幌新千歲機場(CTS) – 名古屋中部國際機場(NGO)

時間:1hr 45min

到名古屋仲有多1個幾鐘先有得checkin,所以去機場入面間丸忠迴轉壽司食午餐,估唔到機場入面嘅壽司店水準都唔錯,價錢亦都唔高,推介!

NGO airport sushiNGO airport sushi 2

航班:名古屋中部國際機場(NGO) – 香港國際機場(HKG)

時間:4hr 10min

 

返到香港又肚餓啦……梗係唔好晒咗最後呢次機會入lounge啦!只要你拎住回程機票同埋相應嘅信用卡,就可以去埋Terminal 2間plaza premium lounge食多餐晚飯,為呢個旅程畫上完美嘅句號!

 

Day 7總結:

午餐:丸忠迴轉壽司(人均2000-2500円)

晚餐:HKG Plaza Premium Lounge

 

#寫出你遊歷 #hutchgo資助旅費1000蚊

Spread the love

About the author

Leave a reply

You must be logged inlogged in to post a comment.