2018探訪普京嘅旅程 | hutchgo blog

2018探訪普京嘅旅程

作者: VEE
5月 31, 2019

#寫出你遊歷 #hutchgo資助旅費1000蚊

 

2018年俄羅斯世界杯,係IG見到好多俄羅斯嘅靚相,已經好想去。咁啱好朋友都對呢個地方有興趣,一拍即合,即刻約實十月尾呢個時間出發。

 

機票

提前差不多四個月係skyscanner keep住睇,最後係hutchgo.com買咗,戰鬥民族俄羅斯航空來回連稅每人都係$4,600,好抵買。

 

酒店

俄羅斯呢個地方即使住四星,每晚都係$1000有找,加上我去嘅時間唔係peak season。最後係聖彼得堡住Boutique Hotel Golden Triangle, St. Petersburg,而莫斯科就係住Mercure Arbat Moscow。總共住7晚都係洗咗$6,213。

 

美食

呢度食飯真係超級抵,普通西餐廳都係平均每人$150有找,呢個仲要係有埋酒飲嘅價錢。一杯紅酒白酒嘅價錢都係$30-$50蚊,平過香港happy hour時間。

 

聖彼得堡4日

Day1

第一日去到就落雪。我咁大個第一次見落雪,但係真係好凍,留係度幾日都係得2度至6度。聖彼得堡原來同芬蘭好近,我完全無諗過10月就會落雪咁誇張。原本計畫第一日就去夏宮,但係因為夏宮離市區超級遠,落雪陰天個人真係好沮喪,最後決定留係Nevasky street行下聖彼得堡最大嘅書店同埋買下零食。

俄羅斯

夜晚就去咗Mariinsky Theater睇芭蕾舞。

俄羅斯

Day2

hea咗一日後,第二日無晒烏雲,雖然仲係好凍,但係勁大太陽,白茫茫嘅雪在太陽底下真係好靚好靚。搭Uber去夏宮,差不都要40分鐘嘅車程。一見到d宮殿就非常震撼。不過建議都係夏天去,會有噴泉同顏色比較繽紛。我去到嘅時候都係白色,感覺自己拍冬天嘅古裝劇咁。

俄羅斯

上午去完夏宮,下午返到市區,去咗Church of the Savior on Spilled Blood。呢度一直處於維修狀態,外面掛住帳幕。係裡面用導賞聽咗一場關於呢個教堂嘅精彩歷史故事。非常推介大家借導賞嚟聽下。

俄羅斯

Day3

呢一日就去咗冬宮,裡面嘅收藏品量非常震撼,行足大半日都淨係行咗幾個區。除咗可以見識到俄羅斯嘅歷史、宗教文化、藝術,仲有日本、印度、西藏等歷史展品。

俄羅斯

下午沿著冬宮外面嘅Neva River一路影相,最後去咗Saint Isaac’s Cathedral。去之前睇攻略大家都教一定要上到教堂最高睇日落,果然名不虛傳,可以俯瞰整個聖彼得堡,好值得行過幾百級樓梯。

俄羅斯

俄羅斯

Day4

因為住嘅酒店周圍就聚集晒最出名嘅景點,最後一日就係酒店附近行。第一站就係俄羅斯博物館。然後下午就去咗Our Lady of Kazan Cathedral,見識咗一場宗教儀式。雖然聽唔明佢哋講咩,但係果刻個內心都瞬間被感染,平靜並有能量。亦都係係果度,我先知道呢d大教堂,裡面擺住好多偉人逝去後的軀殼。朋友仔好大膽去瞻仰,我最後都係選擇遠觀就算。

俄羅斯

夜晚前往俄羅斯,搭咗2人房嘅火車,都係體驗一次就夠,住火車d房好細,唔多方便。

 

莫斯科3日

Day5

莫斯科無聖彼得堡咁北,所以氣溫暖咗好多,都係8度至12度左右。呢日選擇攻略上大家都推薦嘅地鐵遊,呢幾條線非常靚,俾大家參考下:3號線-基輔站 Киевская; 5號線-白俄羅斯站 Белорусская, 新鎮站Новослободская , 和平大道站 Проспект Мира, 共青團站 Комсомольская; 10號線-塔槓絲卡雅站 Таганск特魯布納亞站Трубная, 杜斯妥也夫斯基站 Достоевская

俄羅斯

俄羅斯

然後下午係GUM古姆國立百貨商店行下超級同食下雪糕。雖然呢個商場好出名,但係無咩好買,係個建築設計值得一看。

俄羅斯

夜晚去咗我呢個旅程最鍾意嘅教堂Cathedral of Christ the Saviour睇夜景。係教堂外面嘅Patriarshiy Bridge睇夜景真係一流,將莫斯科嘅景色一覽無遺。因為夜晚教堂已經關咗,我地計畫臨上機前再嚟一次。

俄羅斯

俄羅斯

Day6

呢一日就專門行紅場,去晒The Moscow Kremlin,Dorminition Cathedral,Saint Basil’s Cathedral,State Historical Museum,仲睇咗一場Bvlgari珠寶展。

俄羅斯俄羅斯

俄羅斯

Day7

呢日選擇登高,到莫斯科國立大學行下。無諗過睇完雪,仲可以睇到紅葉。莫斯科仲處於紅葉階段,雖然天色唔靚,影唔除雙眼睇到嘅景色,但一落地鐵,就見到麻雀山滿山的紅葉,果個震撼感覺到依家都記得。行到麻雀山山頂大概半個鐘,沿住觀景台行就見到好大好嚴肅嘅莫斯科國立大學。

俄羅斯

俄羅斯

俄羅斯

夜晚就去咗Arbat Street食野同埋睇下街頭表演

 

Day8

最後一日,晨早就去咗Cathedral of Christ the Savior,咁啱係星期日,又見識咗另外一種形式嘅宗教儀式。然後豋上塔頂。天氣非常好,藍天白雲,完全no filter就影到好靚嘅莫斯科全景。算係非常滿足地返香港啦。

俄羅斯

俄羅斯

分享博客

關於作者

要說點甚麼嗎?

You must be logged inlogged in to post a comment.