陌生又神秘 – 波羅的海三國

作者: Wooly
2月 24, 2019

#寫出你遊歷 #hutchgo資助旅費1000蚊

好多人去歐洲旅行,都會去一啲主流嘅地方,例如法國德國意大利等等,不過,唔知大家又有冇聽過波羅的海呢?可能唔少人都有聽過波羅的海三國,但係邊三國,佢哋嘅地理位置,你又清唔清楚呢?

去得旅行,就梗係想探索世界,於是今次嚟到歐洲,就唔再去已經比旅遊書介紹到爛晒嘅國家,反而嚟咗呢三個好神秘嘅國家,今次嘅行程長達14日,計埋機票住宿,成個旅程總共用咗差唔多一萬蚊,比起英國法國,真係抵玩好多,事不宜遲,即刻同大家介紹一下呢三個國家嘅背景先!

波羅的海三小國曾經比俄羅斯統治,但後尾就加入左歐盟,而呢三個國家就分別係愛沙尼亞、拉脫維亞、立陶宛,佢哋位於波羅的海沿岸,東邊就係俄羅斯,北邊就係挪威,西邊就係隨而呢三個國家就分別係愛沙尼亞、拉脫維亞、立陶宛,佢哋位於波羅的海沿岸,東邊就係俄羅斯,北邊就係挪威,西邊就係瑞典。

係我介紹我嘅行程之前,我先同大家總結一下我對波羅的海嘅印象,其實呢三個國家嘅社會發展,政治,經濟,文化,同埋基建嘅水平,都可以話好過巴爾幹半島同埋希臘,雖然呢度冇西歐咁多名牌可以行,但我可以好肯定咁同大家講,呢度嘅治安絕對係比西歐嘅法國好得多,講笑咁講,其實歐洲嘅扒手係咪去晒法國搵食?呢三個國家嘅首都,分別係里加,塔林同埋維爾紐斯其實都係世界遺產級,所以呢度啲景都好靚。好啦即刻介紹我今次嘅行程呀!

去過歐洲嘅都知道,買車飛呢啲一定要預早買定,如果林尾先買,就俾人据到一頸血,不過嚟到波羅的海三國,呢度嘅交通費同埋門票費用都唔會好貴,所以你絕對可以黎到先買。

因為三小國面積其實都唔係好大,而愛沙尼亞同拉脫維亞好多嘅景點都集中係首都,所以時間方面可以分配得比較少,而立陶宛,因為佢嘅面積最大,而且比較出名嘅聖十字山,同埋特拉凱海上城堡,都係一啲比較遠嘅地方,所以要預留多幾日,作交通之用。成個行程嘅概念其實都係分為兩種,第一種就係由南去北,即係由愛沙尼亞玩到落立陶宛,又或者由北去南。

愛沙尼亞 塔林

塔林係三小國入面最細嘅首都,係歐洲目前保存最完整嘅中世紀老城區,由中世紀城牆圍成一圈,老城區入面有中世紀哥德式嘅建築,亦都有沙皇嘅洋蔥頂教堂。因為比較細,由最北行到去最南都只係要 15 分鐘,行起黎真係好輕鬆,景點密度又好高。買番一張塔林卡,就可以比你玩晒所有景點,另外愛沙尼亞周圍都有 wifi 。

黎到塔林舊城區嘅城門,隔離就係好出名嘅「胖瑪格麗特塔」。胖瑪格麗特塔起係1529年,據說曾經有一位好肥嘅大嬸幫手準備監獄嘅食物、就有左呢個名啦!當然啦,呢個名嘅由來都好有可能係因為佢真係好肥。

市政廣場

路旁嘅大教堂

帕努 Parnu

帕努係愛沙尼亞第四大城,又可以叫做愛沙尼亞嘅「夏都」,當地居民一到夏天,就會黎呢到玩水,呢度可以近距離咁接觸波羅的海,正。去里加嘅路上,最順路嘅城市就是佢。不過帕努真係好細,亦都無咩人,反而令我印象最深刻嘅就是呢度超多樹,綠化程度超高嘅街。

周圍都係林蔭大道,愛沙尼亞係植物綠化程度最高嘅國家,唔會好似香港咁。

塔圖(Tartu)

佢係愛沙尼亞嘅第二大城,亦都係大學城,呢度嘅學校非常之多,文藝氣息比起首都嘅塔林仲濃厚好多,呢度最古老嘅大學,就係塔同大學,有成380年歷史。係塔圖有好多博物館,除左玩具博物館之外,仲有AHHAA MUSEUM(好似係科學博物館,係車站隔離架炸,但係門票都唔平,要成九歐,我地嘅host話連佢都沒去過,所以我地都無去),呢度仲有好多奇奇怪怪嘅博物館添!

買面包餵鴨仔唔知道係唔係一件鼓勵大家做嘅野,但係係塔圖其實都有唔少人係到餵緊,然後因為鴨仔真係好cute,所以我地都跟著餵。

拉脫維亞

里加 Riga

里加係波羅的海入面最大,同埋最商業化嘅城市,街道除左文藝復興嘅風格,仲融合左新藝術風格。日頭嘅里加已經夠多姿多采,大大細細嘅市集、博物館、咖啡店,餐廳、觀景台,搞到根本就無時間去試晒睇晒佢地,個幾日我就係咁怨時間唔夠。里加嘅夜生活仲正,正係邊,你去左就知,所以極度建議大家要留一晚係呢度,無體驗過夜晚嘅里加,千其唔好同人講你黎過里加!

里加大教堂

同其他教堂鬥高,佢又唔夠古城入面嘅聖彼德教堂比,講宏偉,作又唔及歐洲入面嘅大教堂,但係係波羅的海入面,里加大教堂已經係成個地區入面最大嘅教堂啦,而且具備著好濃厚嘅宗教意義。800年前,呢度已經係主教座堂,即係大主教住嘅地方。當然,今時今日,宗教唔會好似以前咁咁重視同強烈,作為里加古城區入面嘅旅遊景點,佢都為旅客帶黎舒適嘅感覺。係教堂嘅側邊,係一大撻草地,附近仲有個露天咖啡鋪,平日都吸引左唔少旅客同當地居民黎呢樹,一邊飲咖啡,一邊欣賞下周圍嘅jeng景,真係好chill。入場係要收錢,不過都係三歐姐。想去嘅朋友可以直接由里加火車站行過去,都係幾分鐘路程。

尤爾馬拉海灘

拉脫維亞位於北緯 50 度以上嘅地方,氣溫雖然比較凍,但你絕對估唔到呢度有好似西班牙、法國南部一樣嘅海灘,大家黎到帶埋泳衣都得。當然,係尤爾馬拉海灘,海水都會偏凍,游水嘅朋友就要小心凍親,去旅行病真係好慘,就算到左夏天,將雙腳浸係水入面一陣,都會凍到避,但係,你黎到呢度都會好享受。雖然真係好少人會落水,但係係風和日麗嘅日子下, 黎到呢度一路享受日光浴,一路吹著清爽嘅海風,咁又一日,真係好寫意。

立陶宛

維爾紐斯 UNESCO

三小國入面最大嘅首都,都係歐洲最大嘅巴洛克古城,建築群好豐富,融合左哥德、新古典同巴洛克風格,相信有讀過history嘅朋友都應該有聽過,雖然景點唔及其他兩個首都集中,但係每個建築都有佢自己嘅特色。各式各樣嘅老教堂同埋維爾紐斯大學為呢座城市帶黎唔少藝術氣息(係呢度直頭覺得自己係詩人),十級推薦大家黎。

聖安妮教堂

係維爾紐斯古城區入面,呢座 15 世紀興建,有好深厚哥德式建築風格嘅羅馬天主教教堂,係古城區入面一個好重要嘅宗教同地標。雖然無好似同其他世界嘅知名大教堂一樣咁大,但係淨係呢個教堂嘅外牆已經用左差唔多成三十幾種不同形狀嘅磚黎起。唔講唔知,呢度有個傳說,就係其實拿破侖都曾經路過呢度,仲話想將呢個教堂帶番巴黎,信不信由你,但從中都見到建築之美,都難怪佢被列入世界文化遺產當中。大家行緊古城之餘,都唔好唔記得到教堂出面影相留念啊!

聖十字山 Hill of Cross

立陶宛最出名嘅景點就係聖十字山,對唔知呢段歷史嘅人黎講,親身到呢度都可能會覺得毛骨悚然,呢度其實係立陶宛人係被強權打壓嘅時候,為親人祈禱用十字架整出黎嘅山丘,山丘都被當局者剷左唔少次,但點知十字架反而更加多。雖然交通唔係好方便,但都一定要去。

特拉凱 Trakai

由冰河湖同中世紀城堡組成嘅特拉凱,距離首都只係得半個中車程,係當地郊遊嘅好去處。如果個日又好太陽又無風,分分鐘仲可以見到紅色城堡係綠色森林入面嘅倒影,除左自然景觀城堡,中世紀嘅歷史都好值得用半日黎參觀。

考納斯 Kanus

立陶宛第二大城,點都要去睇下啦,迷你嘅老城區只要一個中多d就可以行晒,城區細還細,但建築都幾有特色,另一個吸引人嘅地方就係現代化嘅新城,距離維爾紐斯都只係兩個中鬆d嘅車程。

希望大家中意我嘅分享!

分享博客

關於作者

要說點甚麼嗎?

You must be logged inlogged in to post a comment.