統營美食、風景、大海之旅

作者: tinahui17
8月 24, 2018

四月同朋友去左四日三夜釜山,當中去左一日統營。坊間都好多釜山的遊記同介紹,但關於統營的資料就比較少。藉住呢篇遊記,除左可以令我回憶旅程,更希望可以俾到少少統營的參考資料大家。

雖然統營係香港好似無咩人提,但統營係韓國是一個幾出名的地方,首先,統營係三面環海,有大量的海鮮同無限的海景。其次,係歷史上,統營係韓國古時的海軍重地,李舜臣將軍曾經係統營以寡敵眾,用20隻龜船,擊敗以豐臣秀吉為首的日本海軍。第三,統營交通都好方便,係釜山沙上的西部巴士站搭一個鐘鬆啲就到,分分鐘快過經屯門公路出城呀。

年青人,有咩驅使你晨早流流搭車去統營?答案係美食、風景同大海呀!

1

正所謂早安晨之美,我地一落車就搭的士去中央市場附近食早餐啦,早餐就食左統營獨有的烏炸(우짜) ,烏炸其實就係湯烏龍麵再加炸醬,不過因為佢個湯太水啦,所以無咩炸醬味,味道就普普通通啦!

2

食飽之後就係時候去玩啦,統營的第一個景點係去Skyline Luge斜坡滑車,Skyline Luge 分為三種門票,分別係玩一次、三次同五次。推薦大家最少玩三次,因為真係好好玩。首先,係玩之前大家要戴返個頭盔,之後就搭纜車上山頂,係山頂滑落山腳。第一次玩個時有少少淆底,唔夠膽開咁快,到第二三次上手之後就後好enjoy ,一邊望住海景一邊滑落山。

3

之後就食忠武飯卷補充體力,忠武飯卷係統營另一特色食物,以前漁民出海要帶定食物,普通的紫菜包飯有餡容易變壞,於是佢地發明左餡同飯分開的忠武飯卷。食完個味道麻麻的烏炸早餐,本身對忠武飯卷無咩期望,但係食落又唔錯,飯卷用紫菜包住,有好香的麻油味,飯卷就咁食都好好食,連埋泡菜同醃魷魚一齊食仲夾。

4

玩完Skyline Luge之後,行上少少就係閑麗水道觀纜車的入口,閑麗水道觀纜車係全韓國最長的纜車,中間只係有一座塔架支撐住整條纜車,大家可以全方位欣賞到彌勒山同統營的美景。其實本身我地諗住行上山頂,但係一落左纜車去到觀景台已經覺得風景好開揚好靚,可以望到統營全景甚至日本的對馬島,所以我地就放棄左行上山頂,直接係觀景台hea 下影下相就算。彌勒山上另設有兩個透明觀景台,俾大家企係凌空的玻璃上,感受海天一色,大地在我腳下。

5

6

搭完纜車之後,就係時候去醫肚啦,黎到統營一定要食海鮮,今次我地就選擇左係綜藝節目推介的海鮮砂鍋店,海鮮砂鍋的用料非常豐富,入面有蝦、蟹、扇貝、超多蜆同青口,海鮮湯底非常鮮甜,每一啖都係大海的味道呀!

7

食完午餐之後就去東懸崖壁畫村行啦,壁畫村入口有ET 歡迎大家。

8

東懸崖壁畫村的畫非常新淨同密集,比起首爾的壁畫村人流少好多,可以慢慢影,而且沿路都會望到海景,係一條CP值超高的壁畫村。

910

之後就落左山去洗兵館。因為統營靠近日本,為了防止倭寇入侵,所以統營長年都駐軍。洗兵館就係三道水軍統治使營的代表建築,洗兵館係朝鮮三大木建築,整座建築只係用木柱支撑,四面同內部都係無牆。

11

「唐朝在日本,明朝在韓國」呢句話好適合形容洗兵館的畫。

12

統營的最後景點就係西懸崖壁畫村,西懸崖村的壁畫其實唔太多,如果大家唔夠時間,行東懸崖壁畫村就足夠啦! 上到山頂,坐係西鋪樓入面望住大海,非常治癒。

13

落山時正值黃昏。

14

行左咁多路,晚餐就去左釜山西面的豬腳沙龍以形補形食豬腳結束一日的行程啦。

15

分享博客

關於作者

要說點甚麼嗎?

You must be logged inlogged in to post a comment.