土耳其Cappadocia 讓熱氣球帶你翱翔天際

2月 24, 2019

近年成日都見到身邊唔少人去土耳其旅行 發覺原來土耳其都唔係咁危險之餘
原來消費上都相對便宜 而且有唔少靚景 尤其係Cappadocia呢個熱氣球境地~

或者你可能會話 坐熱氣球咪同坐飛機差唔多 都係天上面飛俯瞰大地
而且價錢都要上千蚊 不如慳返啲錢坐 買多張機票去轉台北玩好過啦

話雖如此 但始終熱氣球作為以前其中一個主要航空交通工具之一
加上由細聽到大都覺得係一件Once in a lifetime嘅體驗
仲有呀 亞洲地方可以玩熱氣球嘅地方唔多 台灣雖然有台東可以玩
但景色絕對唔可以同土耳其媲美架 所以就特登飛去Cappadocia感受呢個難忘體驗!

坐飛機去伊斯坦堡 再轉機去開塞利
然後搵左民宿黎機場接送 而且民宿仲幫埋我地安排熱氣球嘅預約
無諗過原來土耳其人都會好似我去台灣民宿一樣咁貼心!

講起搵熱氣球公司 又有一段故事分享
原先同民宿討論熱氣球公司選擇果時 民宿主人比左好多間選擇比我揀
然後主人推薦Kapadokya Balloons呢間公司
佢話呢個世代 愈來愈多熱氣球公司 競爭好大 所以會以廉價黎吸引顧客
上網格過價 發現平至EUR 140 貴至EUR 200都有
分別就在於安全 服務 知名度 同埋搭乘人數等等
當然仲有最重要嘅就係保險啦!

上網睇過一篇遊記 見到有人坐熱氣球降落果陣chok得太勁
整傷左條腰 而果間熱氣球公司就話佢地嘅熱氣球plan唔包保險所以無得賠
所以大家格價果陣都要留意自己需唔需要包埋保險 定還是自己旅遊保有包呀!

最後我揀左個EUR 180同時包埋人身安全保險嘅plan
始終係件一生人一次嘅經歷 洗豪少少都唔拘啦!

終於正式起行啦!

晨咁早天都未光 熱氣球公司就派車隊黎民宿接大家上山

大家記住要注意禦寒啊 仲記得我坐上山果陣 得5度 邊坐車邊打冷震 真係好凍!

坐左半個鐘車程終於到左熱氣球飛行基地喇

熱氣球公司係度安置同準備熱氣球所需物資

好貼心地 熱氣球公司仲準備左早餐比我地食 幫我地充飢

突然間遠方變得好光 原來係其他熱氣球公司點火嘅光黎

係漆黑之中傳來嘅光亮 影到遠方嘅橡樹都幾有feel~

其他公司都紛紛準備點火起飛喇

終於到我地公司點火 遠處睇都感受到點火嘅熱感 真係好佩服點火員每次都要抵受咁熱嘅溫度!

熱氣球終於膨脹起來啦 好興奮啊!

不經不覺我地嘅熱氣球已經直立喇 領航員打開張凳 比我地踩住入去熱氣球籃入面

入到去有火係隔離全身即刻覺得好暖

熱氣球中間放置住六罐氣體 就係我地起飛嘅燃料黎啦!

駕駛員測試梗加熱引擎 熱氣球入面一共有四個加熱引擎要輪流測試
其實飛行果陣只會用一個 剩低三個就係後備黎既
當熱氣球入面載住嘅空氣加熱果陣 密度就會慢慢降低
從而產生浮力令熱氣球上升 所以只要控制熱氣球氣體嘅溫度 就可以控制到飛行高度啦

準備好之後 地面職員都幫我地解開繩結 起飛嚕!

地面人員同我地揮手講拜拜 驟眼睇見到要準備飛行都要6個職員
而且要準備接送車同埋燃料 林林總總嘅野 準備工夫真係好多
所以EUR 180可以話係物有所值嘅!

其他熱氣球都趁日出前紗紗起程喇 我地個熱氣球都開始緩緩上升
起飛一刻相當平穩 完全唔似飛機起飛咁顛簸 成個感覺真係好特別!

駕駛員一路控制加熱器 一路同我地講解周邊景色

去到咁上下開始見到其他五顏六色嘅熱氣球都升空嚕
同我夢寐以求嘅景色一模一樣 真係好浪漫呀!

竟然比我地見到另一架一模一樣嘅熱氣球外表

從我地嘅熱氣球望上去就係咁嘅樣 唔知點解覺得可以用黎做電腦wall paper~哈!

眨吓眼就超越左岩岩對面個熱氣球嚕 其實要黎土耳其除左要體驗熱氣球之外
另一重點就係係高空俯瞰Cappadocia嘅險要山勢 係大面山坡入面坐落左一個小村落
呢個景除左係電腦wallpaper見過之外 今次終於比我真眼見到喇!

除住熱氣球再繼續爬升 終於可以見到太陽要竄個頭出黎啦!

無論係日出定日落 見到天空漸變顏色都會覺得好陶醉

認真數數 發覺原來呢張相入面捕捉到54粒熱氣球
但現實中係180度都有熱氣球圍住 真係好壯觀!

太陽繼續爬上黎啦!

當太陽爬得愈高 天空嘅熱氣球就會變橙紅色 相當有朝氣

其中一個最期待嘅畫面就係係上空親眼見證呢個嶙峋大地
已經無任何字可以形容到呢片景色係何其壯觀喇!

俯瞰其他熱氣球嘅樣子

見唔見到有個土耳旗國旗熱氣球呢 可以話最容易係一堆熱氣球入面最突為而出嘅一個design!

睇見其他熱氣球愈黎愈高 即係意味住我地即將降落喇

要準備降落嚕!

原來降落果陣 地面人員係要不斷同空中駕駛員溝通 尋找一個合適嘅降落點
所以我地起飛果陣係完全唔知道自己會係邊度降落架
最後地面人員就將我地嘅熱氣球嘅繩固定係樹幹上面 準備降落動作

見到佢地都好落力咁幫我地準備降落 辛苦晒一班地面職員喇

我地個熱氣球籃固定係卡車上面回程~

最後地面人員準備左支香檳慶祝成功安全飛行同著陸

原來呢度嘅熱氣球公司嘅傳統黎 每間熱氣球公司飛完之後都會開香檳慶祝!

一齊舉杯向天 襯托住天上面嘅熱氣球~Cheers!

#寫出你遊歷 #hutchgo資助旅費1000蚊

分享博客

關於作者

要說點甚麼嗎?

You must be logged inlogged in to post a comment.