探索大自然之美 情迷藍色馬爾他 | hutchgo blog

探索大自然之美 情迷藍色馬爾他

作者: ipadlee
2月 22, 2019

上年去意大利exchange嘅時候 成日都係身邊嘅同學聽到

馬爾他係一個好藍好靚嘅國家 係一生人要去一次嘅地方

所以今年年頭grad trip去歐遊都特登plan留咗幾日

特登要飛過黎呢個小島探索吓!

係介紹呢個國家嘅美之前 等我同大家簡單介紹吓馬爾他係個咩國家啦!

馬爾他全名係 馬爾他共和國Malta 位於地中海入面意大利南方嘅一個島嶼國家

國家面積並不大 由三個島嶼組成 包括Malta, Gozo同Comino

揸車嘅話由Malta南部揸到北部都唔洗一個鐘 但唔好睇小呢個細島國 正因為鮮為人知少遊客 佢仲保留到唔少歷史古蹟遺留 同埋擁有住大自然嘅瑰寶

Day 1 – Valletta

馬爾他機場 細島國都預期機場規模都比較簡單

馬爾他嘅首都係Valletta 成個城市都係世界歷史遺產 既然岩岩到埗

呢張相就係最典型嘅馬爾他歷史建築街道 仲保留住上世紀嘅韻味

大家都可以睇吓大街小巷嘅照片 感受一下呢個歷史小國

行咗一個晏晝 其實都差唔多逛完首都嘅特色地點同建築 因為岩岩到埗又有jetlag 所以好早就返酒店休息嚕

馬爾他的第一印象:

行完成個首都 完全感受到呢個國家相當簡樸 馬爾他盛產石灰 人口只得46萬

但係觀光客卻超過100萬 可見旅遊業都佔左大部分嘅國家收入

或者可能係因為冬天淡季 仲要weekend落機 成個城市嘅店舖都閂得七七八八

所以Malta比我嘅first impression都幾蕭條!

如果大家想黎旅遊嘅話 建議揀夏天黎呀

因為會有唔少festival同埋煙花匯演 聽exchange同學講都幾熱鬧架!

Day 2 – Blue Grotto & Gozo

黎到第二日 一於船遊藍洞!

聽左同學講左咁耐 終於可以黎探索馬爾他嘅藍色世界喇!

揸車黎到Blue Grotto 居然唔洗排隊就可以上到船 所以淡季黎都有好處架!

出發嚕!今日天公造美 陽光非常充足!

我從來都無見過咁藍嘅海天一色景色架!

我而家諗返起exchange同學同我講過話呢度嘅藍色係有無限種配搭同層次

我終於感受到啦!成程船trip 因係可以係唔同嘅角度睇到唔同嘅藍色

可能係因為我係藍色控 所以成程trip我都好興奮咁不停影相XD

入到藍洞 可以見到淺蔥色嘅海水

正因為洞穴嘅位置同埋陽光嘅折射 令到藍洞擁有住咁獨特嘅藍色海水

而且海水真係好清 清到可以完全睇到水底!

海水清到連水母飄過都睇得好清楚呀!

由藍洞入面睇返出去~見到個呈心型嘅拱門~

洞入面仲可以睇到紫色同橙色嘅珊瑚礁添!

不過因為洞穴入面光線唔夠 所以影唔清啲珊瑚礁 L

全程15分鐘嘅船遊話咁快就完嚕!

Gozo

遊完藍洞 就要入呢個旅程嘅重點喇~Gozo島!

由馬爾他坐船去Gozo島都只需要半個鐘 仲可以載埋車去添~!

落船之後 就揸車去Saguna Cliff 落車再行十分鐘路就去到懸崖邊

由懸崖邊飽覽地中海一望無際嘅景色

睇到眼前嘅疊層斷崖 真係覺得不枉此行!

馬爾他周圍都唔難見到小黃菊

離開Saguna Cliff之後 食個午飯就出發去藍窗喇~

藍窗之所以有呢個名 係因為呢度嘅岩石經過多年嘅風化 侵蝕 融化作用之後

形式左好多個好似窗嘅窿~

問過當地人 原來呢度都係叫藍洞架喎!比起今朝去嘅藍洞見到嘅藍

呢度嘅海水偏深色 可能係因為下晝陽光收起左 令到海水變左靛色~

15分鐘嘅船遊又話咁快完左嚕

返到岸邊果陣 居然比我見到耶穌光!

見到遠方嘅海面就好似拍戲咁光照海面 感覺好唔真實但係好神奇啊!!

當烏雲徐徐移開 整片大地都變得更加光明

過左一陣見到太陽都開始要落山 即刻衝去北邊少少嘅懸崖睇日落!

睇見大陽緩緩咁向住海平線下降 成個日暮令人好治癒!

Day 3 – Marsaxlokk

黎到馬爾他最後一日 plan左黎馬爾他東南部嘅漁村Marsaxlokk

呢度嘅漁船都有個特點 就係船頭有眼睛架!

呢種漁船就叫做Luzzu 而呢個漁村就曾經係馬爾他嘅貿易港口黎架!

呢度嘅漁民都會坐luzzu捕撈魚獲 然後再運去其他城市度賣~

歐洲人嘅藝術細胞真係非常令人讚嘆!

每架luzzu都有佢地獨一無二嘅外貌

咁岩就比我遇到當地人幫架漁船油上顏色

係我印象中嘅漁村總係彌漫住魚腥味同埋飄浮住污糟嘅海水

但係呢度一啲腥味都無 而且水依然都好似琴日去藍洞咁清澈呀!

最後我就係呢個咁迷人嘅漁村chill咗成個下晝~

五顏六色嘅漁船為呢個港口增添唔少色彩!

感受完呢個漁村慢活嘅態度之後 就打道回府 準備下一個旅程嚕!

後記:

成日都聽到唔少香港人黎歐洲 一定會去英國法國意大利 呢啲典型嘅西歐國家

但係其實歐洲入面有好多二線嘅旅遊國家 除左少遊客之外仲有好多獨特嘅文化同埋歷史背景 好值得我地去探索架!

最難得嘅係呢啲國家真係好少聽到有香港人去 遊記又唔多 所以希望呢篇遊記可以作為大家plan馬爾他旅遊嘅參考之餘 都可以喚起到大家留意歐洲入面嘅特別旅遊地點 好似馬爾他咁!

#寫出你遊歷 #hutchgo資助旅費1000蚊

分享博客

關於作者

要說點甚麼嗎?

You must be logged inlogged in to post a comment.