[幸魚遊世界 – 台北宜蘭] – 抓周@國立傳統藝術中心

作者: roy1103jo
9月 11, 2017
今次去返台北宜蘭旅行, 最大既情意結就係要同煮魚去玩抓周, 估唔到短短一年半時間, 抓周價錢都貴左一倍有多, 事關依家場地轉左, 大左靚左, 仲有埋錄影, 今次同上次一樣, 電郵左小朋友資料去傅藝, 之後去到再比錢
想當年, 幸晴仲係一個好Q唔識駁咀既細路
今次預約左中午時間, 我地早左少少到順便參觀埋傳藝, 聽聞裝修完後靚左, 多野玩左, 果然連個門口都唔同左呀! 好藝術既感覺, 岩晒我呢D文青去, XDD

到埗第一件事係去information center借娃娃車, 費用全免, 登記資料再留低護照就借得架啦, 娃娃車租兩個鐘, 如果冇其他人借車可以再續借

呢條好似古妝街呀, 兩邊既商店都有唔少野賣, 我地就買左個陶笛返屋企吹, 玩得最開心果個係我

IMG_1164

就算唔買野, 周圍行下, 欣賞下佢地既佈置都好寫意, 只係果日太熱, 我地急急腳去搵冷氣

同煮魚食埋粥仔, 就行去玩抓周啦, 今次抓周場地轉左, 好似去左古時候人住既大宅咁, 先登記完, 去左一個類似祠堂既地方影下相(會有職員幫手影家庭照), 再入戲肉去玩抓周, 今次抓周轉左有獨立房, 一家大細成村人一齊去都唔會嫌逼, 好啦誇大左少少, 我估你十個人黎會逼逼地既….

同上一次一樣, 摸下假龜, 踩下龜背, 聽職員講一埋明明係國語但又唔多聽得明既野, 煮魚仲要縮起對腳唔想踩, 我同幸晴掛住笑佢更加聽唔清職員講野, XDD

之後, 就戴虎帽同戴口水堅, 抓周正式開始!

佢一黎摸下本書, 又摸下結他, 又摸下算盤, 但就係都唔拎起, 因為講明唔拎起唔算數, 所以等左好耐都未有得歡呼, 到差唔多冷場時(個職員都冇野講到既時候), 佢就先後拎起左電話(科技新貴), 金元寶(金融家/銀行家), 同印章(總統/公務員), 啊, 三樣職業都好悶咁既(錯重點)……

IMG_1212

玩完晒最後就係爸爸媽媽同姐姐對煮魚講兩句祝福既說話, 其實都係同一句: 身體健康, 快高長大, 開開心心

之後職員去左燒光碟既時候, 幸晴姐就一齊玩, 再玩埋細佬……

拎完碟想住走得, 原來仲有條口水堅, 要我地用紅線既繡花, 祝賀BB健康長大

跟住我地就去左食野, 又係一間可以玩既餐廳, 係門口已經有個沙池, 又有得釣魚

講真, 野食方面真係麻麻地, 最驚奇既係兒童餐既伴碟蔬菜居然係有黑椒, 辣既!

但買兒童餐既話, 就可以免費入去遊戲區玩, 冇理由唔買架…...因為要付費既關係, D設施整體都係整齊同乾淨

其實傳藝仲有好多野睇, 好似布袋戲咁, 真係好靚好華麗, 仲有布袋戲表演睇, 有機會要再去睇

入面仲有好多得意野, 好似呢個爆旋陀螺咁, 真係坐得又轉得架

怪不得上網睇D人話傳藝可以玩一日啦! 我地玩左四個鐘都未夠喉, 仲有好多野未睇得晒呀!

國立傳統藝術中心

收涎抓周

地址: 宜蘭縣五結鄉五濱路二段201號
營業時間: 0900-1800 (旺季至2000)
門票價: NT$150 (6歲以下免費)
分享博客

關於作者

要說點甚麼嗎?

You must be logged inlogged in to post a comment.