十日由南到北玩盡葡萄牙!南部城市Lagos! | hutchgo blog

十日由南到北玩盡葡萄牙!南部城市Lagos!

作者: emma
12月 3, 2018

今次要同大家介紹南部城市Lagos! Lagos位於葡萄牙嘅南部Algarve地區,出名陽光與海灘,親親大自然,仲有海岸線及岩洞可以睇!
IMG_6961
點去?
由里斯本火車站坐巴士出發去到南部城市Lagos,需要大概四個鐘嘅時間,巴士去到南部地區會經過多個唔同嘅城市,而終點站就係Lagos! 當然大家可以選擇坐火車, 但係同其他遊客討論過都係覺得搭巴士會比較直接,因為火車唔係直達,要轉中途站,價錢時間亦都差唔多,都係20歐 。如果要坐飛機,只可以去到鄰近城市Faro, Faro 同Lagos有火車可以連接,但每日班次唔多,大概一個小時一班,所以大家通常都選擇坐巴士。當然Faro本身都有好多景點可以睇, 絕對係一個值得去嘅南部城市。

南部城市—Lagos Key Highlights!!

IG
岩洞沙灘—Benagil Caves!!!!!! 係媒體公認的「世界16大各具特色的海蝕洞景點」之一!離Lagos大約30分鐘船程。

IMG_6846
Lagos 係一個好簡單嘅沿海城市,一入到區內就會有一條運河,沿着運河向前行就會去到市中心,沿路會經過一個魚市場大家可以入去睇睇葡萄牙嘅街市同香港嘅街市有乜分別,我嘅結論係一入到去都係聞到一陣陣腥味,格局同香港都差唔多。
12
市中心食肆同商店都非常集中,市中心嘅街道充滿咗手信舖,餐廳,所以要搵嘢、食嘢、買嘢一啲都冇難度!
1
到步第一件事,首先係睇下有冇Day tour可以join, 因為去到南部大家最想睇嘅地方就係Benagil Caves!水上活動是Lagos的一大活動,大家可以選擇出海去睇洞穴、玩Kayak 、睇海豚。兩個小時嘅洞穴探索,大概需要40歐。注意:所有水上活動都好受天氣影響。我十月中去嘅時候就聽到好多朋友講所有嘅Day Tour已經連續取消咗兩三日,當地一直落雨,因為大家好好彩遇到一個幾百年都唔打一次嘅颱風!

第一日因為已經坐左四個鐘頭巴士去到南部pat pat痛到一個點,所以選擇咗喺市內走一走,睇一睇有啲咩特色小店同埋餐廳。呢度嘅紅酒真係好平,遊客係餐廳食Pizza之餘,就喺度飲紅酒好嘆!食完午餐之後,就出發去行沙灘!溫馨提醒大家着多件褸因為沿海真係比較大風。
IMG_6886

睇相都覺得好歎!大家拎住本書坐沙灘,吹海風,聽海浪。好多hostel或酒店都會出租沙灘毛巾,可以租去坐一坐沙灘或者落水玩一玩。 睇完一個沙灘我就繼續沿着大馬路向上行,沙灘一個接一個,一個靚過一個。每個沙灘都可以行落去睇睇,得意嘅係每一個沙灘其實都係連接住嘅,如果冇潮水上漲,可以由一個沙灘行到另一個沙灘,而唔需要行返上地面再落沙灘。
IMG_6920
行行吓就比我發現到經過呢個小洞穴就可以去到另一個沙灘啦!
IMG_6930

因為我去嘅時候係下午時間,水位都有啲上漲同大浪,要等浪退散再慢慢行入小洞穴。大家記住注意安全!

行到差唔多都覺得好攰係時候返屋企唞一唞,今次選擇住喺市中心嘅一間hostel,紅色外牆,非常顯眼又易搵! hostel細細間但係感覺好溫暖,係海洋主題,令人覺得非常舒服!而且有個好靚嘅天台,係大家約埋飲紅酒嘅好地方!當晚就同hostel新認識嘅一群女仔一齊飲紅酒,sangria 一杯接一杯,飲極飲唔完!飲酒當然係要傾吓計,大家分享自己之前住hostel嘅經歷。有一個加拿大女仔,分享佢之前喺愛爾蘭嘅hostel經歷,佢話佢自己住hostel住到隔離訓左個戀童癖犯,事緣係佢聽到佢隔離床位個男人同電話裏頭嘅另一個人嘅對話,電話裏頭個人話:youre world famous now, youre on the news! 聽聽下佢發現原來佢隔離嗰個係一個戀童癖嘅犯人,俾人通緝緊。之後佢立即要求調房同搵警察拉左佢,嚇死佢!大家傾下,飲下,笑笑下,咁就過咗一晚!

第2日一起身—落大雨! 個天灰之餘,我個人都好灰,原來約左出海睇benagil caves!最後成班女仔只能夠圍埋喺hostel 個廚房度一齊吹水,咩都講下,有兩個巴西女仔分享左佢哋當地嘅政局,佢話巴西做緊大選,但係啲人要選一個獨裁總統,仲恐怖過Donald Trump,真係不敢想像!如是者吹水,返房瞓覺,輪迴左幾個鐘!我哋決定出去飲杯咖啡,食件cake 繼續吹水,下午三點終於停雨啦!我決定繼續去行埋昨天未行完嘅沙灘,目標係去哂五個沙灘同燈塔。
IMG_7033

沿路一直行大概需要30分鐘,但停留時間就因人而異。我自己每去一個沙灘,大概用15至20分鐘影勁多相,所以去完五個沙灘大概都用咗最少兩三個鐘頭。
IMG_7012
注意:上落沙灘,有大量梯級!!!
IMG_7028

呢五個沙灘都係一啲遊客熱點,所以沿路就算自己一個行都唔覺得孤獨,因為有好多獨行嘅遊客同你一齊行!

IMG_7014

我三日兩夜嘅行程去到第三日,太陽就出來了!真係覺得天助我也,今次行程最想睇嘅就係呢個洞穴,如果睇唔到真係灰到不行!當日參加了早上九點半嘅Tour,總共有七個人,當中包括一名大概三個月大嘅嬰兒。真係吹到媽都唔認得呀!
IMG_7135
但我唔建議老人家同行,因為快艇以高時速行駛,對有背痛嘅老人家會係高難度挑戰。一開船快艇就直衝去Faro方向,位於Lagos西面大概30分鐘嘅船程。之後就去到Benagil Caves,當日有啲大浪,我哋只可以坐艇喺洞口前慢慢進入,好可惜睇唔到最值得打卡個洞洞!
IMG_7166

如果下次再返嚟,建議大家一定要參加kayak, 用自己嘅力量去睇洞穴!之後導遊都帶咗我哋去其他不同的洞穴,去欣賞當地嘅大自然風光。這個Tour 好值得,參與建議大家可以一去!
IMG_7227 IMG_7154 IMG_7278
快樂嘅時間過得太快,三日兩夜海灘之旅,完。
下次同大家分享北部城市—波圖!

#寫出你遊歷 #hutchgo資助旅費1000蚊

分享博客

關於作者

要說點甚麼嗎?

You must be logged inlogged in to post a comment.