感受完好的中世紀古城-克羅地亞Dubrovnik

作者: candicecww
3月 24, 2019

我對克羅地亞嘅印象,始於為2018年世界盃,克羅地亞奪亞軍,成為左全球熱話。

自此起,就多左留意呢個國家,最後趁清假plan左個trip特登飛黎呢度感受南歐風情。

克羅地亞嘅首都薩格勒布位於克國嘅北方,而我要介紹嘅中世紀古城-杜布羅夫尼克(或稱Dubrovnik)就位於克國嘅南方,距離其他主要城市較遠,但因為咁,呢度比起首都少左一份都市煩囂。

Dubrovnik嘅古稱叫做拉古薩,而後來城外一個名為Dubrons嘅部落因為逃避外族攻擊,從而逃去當時嘅拉古薩共和國尋求庇護,最終被安置係共和國嘅邊緣區域,於是後人就稱呢度為Dubrovnik,亦都係呢個城市咁偏僻嘅原因。

黎到古城遊歷,絕對唔可以錯過保留得相當完整嘅大城牆!

更加特別嘅係,因為呢度車少,加上中世紀建築保存完好,令到我置身此地好似時光倒流返到去中世紀一樣!

而Dubrovnik古城嘅入口通道都相當特別,有個成日係古代戰爭見到嘅城門

呢度就係古城城牆後面嘅風景啦!

古城入面都有唔少遊客,而古城入面都有唔少街頭賣藝表演,相當熱鬧

呢條就係古城入面嘅大街,聽聞以前呢個城係一分為二:一邊係一個名叫Srđ嘅山上面開始興建;另一邊從海邊岩石開始興建,兩片大地嘅中間係一片濕地,直至十二世紀先被填平,演變成而家我地見到既中央大街。

呢邊就係依山而建嘅部分,沿路行會發現有好多樓梯,山上主要都係有住宅、餐廳同埋旅館。

古城入面都係四四方方被圍牆圍住,基本上都係平路為主,唔會行得好吃力

小巷風情

古城廣場

呢度入面有間戲院,因為第一晚落左場大雨,所以我地係度睇左場戲避雨~

古城入面面積唔算好大,花左大約半日就可以行完一圈。但係除左周圍行之外,其實仲可以去行城牆頂,去古城外面搭纜車上山俯瞰Dubrovnik,仲可以搭船出附近島仔感受小島風情。

接著果日因為好好天,所以我地就選擇左慢慢行城牆,捕捉呢個城市迷人嘅一面。

上山前建議:一定要準備大量水,因為行山上去加上咁好天,體力消耗咁大,一定要注意補充水份,以防中暑呀!

上山沿途景色

近近地捕捉紅磚屋頂

由城牆上俯瞰古城廣場,唯獨差咁啲馬車,如果唔係真係會以為返左去中世紀呀!

去到上面其實遊客唔多,所以好輕易都可以搵到靚位影高空俯瞰廣場嘅景色

上山途中見到有位伯伯賣畫~竟然係一個城牆付費區內有人賣藝,好特別!

佢係度貼晒佢所有作品係牆上面,好似一個小型畫廊咁~不得不佩服歐洲人嘅藝術底蘊!

係我望住佢親手畫嘅情況下,佢就完成左呢幅畫。覺得佢畫Dubrovnik海景好應景,相當精緻。最重要係一啲都唔貴,呢張賣2歐咋!

唔講唔知,原來伯伯呢個位置係以前軍事演練嘅小廣場黎。而家咁和平梗係用黎賣工藝品啦~哈哈!

由Srd嘅山上面望出去海邊,真係心曠神怡!

呢度見到古城外黎嘅車路

而呢邊向海,當然吸引到我注意啦!

海天一色,一望無際,呢一刻我所有煩惱都拋開晒啦!

崖邊岩石形狀相當特別

係個咁靚嘅景色入面,時不時都會有人玩獨木舟,實在太令人陶醉啦!

而呢度面相山頂,見到有啲破舊建築,反而為古城增添左一份韻味~

求其影一幅都可以拎黎做postcard!

呢度可以望到Dubrovnik嘅外島

從高空俯瞰地面,視覺都幾得意

其實成個通道都幾長吓~我行下影下影咁都用左我半日時間呀!

呢度係Dubrovnik嘅港口,係由十五世紀嘅一個當地工程師Paskoje Miličević 設計嘅

最大特色係果三個拱門,原本係個兵工廠黎,而家已經改建成餐廳同戲院。

終於就黎行到最高點

呢度就最高位Minceta Fort

但係因為行到好攰,無再往上行了

去到返黎起點,終於行完一圈落山嚕!

前文提到因為落大雨,所以入左戲院睇戲~睇完戲出黎變得天朗氣清,非常驚喜

呢度嘅夜景相當有feel

睇完戲都已經九點幾,街上面都仲有好多遊客,感覺十分安全。

然後我地去左古城入面最多人推薦嘅西餐廳,餐廳外面band show,氣氛好好。食物賣相同味道都一流~值得推薦!

我地食飽走之後,出面都仲見到有人排隊,可想而知呢間餐廳係幾咁受歡迎呢!

而呢一餐美食亦都為我Dubrovnik古城之旅畫上句號。

#寫出你遊歷 #hutchgo資助旅費1000蚊

分享博客

關於作者

要說點甚麼嗎?

You must be logged inlogged in to post a comment.