文化探索千年古都-雅典

作者: andywan67728
2月 23, 2019

由細到大讀書成日都聽到希臘係好多知識同埋文化嘅起源

無論係科學數學定哲學 樣樣都可以見到古希臘文明嘅厲害之處

雅典係希臘嘅首都 亦都係南歐嘅其中一個航空樞紐
作為鍾意快閃嘅香港人 我坐長途機就特登揀左係雅典stopover

出一出境兩三日去探索呢個千年古都!

 

第一日

岩岩到埗 拖完行李去酒店安頓 都只得返半日時間

所以最適合安排一啲短暫同埋密集啲嘅景點

坐地鐵站去Monastiraki 站

哈德良圖書館

公元132年,由羅馬皇帝哈德良時期建成。

但圖書館最後係公元267年因為戰爭而被破壞,

所以而家嘅哈德良圖書館剩係得返入口嘅門柱遺址。

古羅馬市集&風之塔

古羅馬市集建於公元前1世紀,係羅馬時間係市中心入面最熱鬧嘅聚會地點。

市集裡面有個呈八角型嘅建築,亦就係風之塔。

風之塔嘅雕刻非常清晰,保養得好完整,相傳係由知名天文學家Andronikos of Kyrrhos設計。

然後坐地鐵去ΣΤ.ΕΥΑΓΓΕΛΙΣΜΟΥ站,黎到憲法廣場再向山上方向行,大約20分鐘就到山頂纜車站,再搭纜車上山頂。

山頂纜車站

上到山頂嘅景相當令人心曠神怡

山頂上面有間skybar 性價比相當高 份量大 大家經過山頂嘅話不妨試一試

係skybar hea終於等到天黑 俯瞰成個雅典城 真係好震撼!

睇完夜景之後沿路落山返到地鐵站。

坐地鐵去Monastiraki 站,感受呢度夜城市生活。

呢度有好多餐廳酒吧,好熱鬧好有氣氛,附近仲有souvenir shop可以買手信添!

 

第二日

第二日嘅行程主要圍繞Acropolis衛城,因為熱門景點會有好多旅行團到訪嘅關係,建議早啲黎衛城參觀避開旅行團

坐地鐵去Acropoli站,沿路向西面行上山,途中會經過戴奧尼索斯劇場。

戴奧尼索斯劇場

古雅典人好鍾意係呢度集會討論政治、宗教、科學等等嘅議題,有啲似我地香港嘅城市論壇吧!

再沿路上山坡,就可以行到山上衛城

衛城

衛城嘅面積其實唔大,主要分為帕德嫩神殿同埋伊瑞克提翁神殿,

但因為有好多旅行團會帶團黎呢度,所以一定要早少少黎呢度影相打卡呀!

伊瑞克提翁神殿

行左兩個鐘衛城就落返山嚕,沿途落山會見到火星山丘。

其實係一舊大石,但係好冼所以好難爬上去,而且都要相當嘅氣力!

係火星山丘上面可以遠眺雅典景色,可以見到尋日行過嘅古羅馬市集同埋風之塔,

仲有衛城山腳嘅古市集,入面有阿塔羅斯柱廊同埋海菲斯塔神殿,一陣就行過去嚕!

衛城山下古市集Ancient Agora

係雅典入面其中一個好出面嘅古市集,同古羅馬市集一樣,都係比人討論唔同議題嘅大廣場。唯一特別既地方係,知名哲學家蘇格拉底同埋柏拉圖曾經都係呢度發表過演說!身處呢度就諗起自己以前讀哲學果陣都有讀過柏拉圖嘅著作《理想國》,幻想佢係度講洞穴的比喻,相當有趣!

成個古市集真係好大!行左兩個鐘先行得晒~

海菲斯塔斯神殿

海菲斯塔斯神殿應該係成個古市集入面最具代表性嘅景點之一,呢度嘅遺跡保存得好完整,殿內供奉希臘神話入面嘅火神Hephaestus,所以呢個殿亦都叫做火神神殿。

阿塔羅斯柱廊

仿照古希臘時期建築重新建造,展示出古希臘輝煌嘅建築

古市集位於布拉於區,附近民房都好靚

然後坐地鐵去Acropoli 站,行去哈得良拱門

哈德良拱門

呢座拱門係雅典為左紀念羅馬皇帝哈德良而建立嘅,仲有尋日都有行過哈德良圖書館,可見哈德良皇帝對雅典嘅發展都有好深遠嘅影響。

宙斯神殿

沿拱門行多陣就會行到宙斯神殿。

顧名思義,係用黎供奉宙斯嘅神殿,曾經係雅典最大嘅神殿,

入面仲有尊雕像,係哈德良皇帝向宙斯奉納嘅雕像黎。

不過可惜神殿都係逃唔出戰火嘅侵襲,古物被搶劫一空,

神殿被破壞,所以而家得返15條石柱遺跡。

帕那辛奈克體育場

世界上唯一完全用大理石建立嘅運動場。係1986年為左舉辦第一屆現代奧運會而重建。場內真係非常壯觀!

奧運會頒獎台

逛完運動場,然後坐地鐵去Panepistimio 站

希臘國家圖書館

雅典大學

建於公元1837 年,係希臘第一間國立大學,亦都係東南歐入面歷史最悠久嘅大學之一。

雅典科學院

入口兩邊分別係蘇格拉底同埋柏拉圖,象徵住人類哲學史嘅權威同埋起源

行入去可以見到有條高柱,分別係戰神雅典娜同埋太陽神阿波羅,

相信大家都唔會陌生,完全感受到雅典學院嘅氣勢同埋莊嚴!

行完雅典學院之後,返去憲法廣場睇衛兵交接儀式。

搭去Monastiraki 站,可以搵到附近有一個市集,入面有好多檔賣飾物同埋手信,

非常熱鬧,仔細行話唔定可以搵到寶物添!不過因為要趕行程所以都沒花好大時間係度~

入面可以搵到呢檔賣好多本地特產,包括橄欖油同埋手工肥皂~

行到夜晚出返黎見到衛城會有打燈~不過入夜之後衛城唔再開放入場,所以只能遠觀欣賞嚕~

第三日

基本上第三日我都係市區度周圍逛逛,食完早餐之後就拖住行李搭出機場嚕!

雅典俾我嘅感覺好有文化氣息,而且因為希臘由細聽到大,覺得自己黎到呢個古都親眼見到神殿古跡,真係好神奇!

有機會嘅話,真係好想再黎希臘,探索一下雅典古都以外嘅小島風情!

#寫出你遊歷 #hutchgo資助旅費1000蚊

分享博客

關於作者

要說點甚麼嗎?

You must be logged inlogged in to post a comment.