峴港Mindfulness遊!

作者: bowbowhung
4月 24, 2019

#寫出你遊歷 #hutchgo資助旅費1000蚊

上年辛苦左一整年,所以係今年年頭去左峴港度假。之前上網睇過話果度既美溪沙灘既日落係全世界第六美麗,所以就襯住年頭既時間走左去潮聖! 峴港除左出名食海鮮平之外,原來仲有唔同既地方比你去explore: 巴拿山手掌橋,美溪沙灘,Con market同粉紅色教堂等!

去到峴港機場後,由於出發前已事先係網上搞左簽證,所以入境非常地快! 之後就急急腳行左去機場出面既兌換店唱錢。 記住帶美金去唱係最抵(係香港唱錢唔抵),同埋最好就一次過係機場唱曬,因為出到去市區,行到邊都唔見有兌換店,唔想出到市區唔夠錢用就係機場出面既兌換店唱定先了。

而係搭車方面就要小心D了,因為機場外面既的士佬都係呃遊客的,係咁同我地講呢度無其他車出市區,開價550000VND出市區,即係差唔多190港紙,我地緊係唔制啦,之後CALL車只係需要88000VND,約30港紙,也差太遠吧!!! 所以去到vietnam搭車要好小心,唔好咁易比人呃喔!

唱完錢即變百富翁哈哈!

HKD1:2950VND (JAN/2019)

美食篇

Vietnam峴港海鮮真係CP值極高,明碼實價的,絕對唔會呃你,成個旅程我地都食左兩餐海鮮餐,計番港紙兩餐加埋都只係$750,但我地呢兩餐都係又食蝦又食蟹,係香港呢個價唔會食到咁多野吧!!! 所以去到Vietnam除左食河粉之外,海鮮絕對係必食,因為價錢平之餘,即係新鮮即撈即整,仲有得比你自己決定係點整的。重點係仲可以係海邊附近既馬路旁吹住海風慢慢品嚐TIM

當然,除左食海鮮之外,緊係有食埋Vietnam出名既PHO啦,河粉好正喔!!! 每碗大概係30000-40000VND,即大約10-14一碗,真心好抵食。物價完全拍得住泰國哈哈

仲有仲有,黎到Vietnam一定要食呢度既法式面包,面包入面會有唔同既材料,例如有雞肉,牛肉,青瓜等等配料。而我地住既酒店附近就有法式面包賣,而且價錢仲好平民,只係需要12000VND,即係5蚊港紙就食倒(Shocked),買兩個食就已經飽飽,真心抵食!

景點探索篇

峴港其中一個出名既景點就係當地一座好令既粉紅色教堂,如果唔想影相太多人,建議朝早去,因為晏就真係會好多人。呢座粉紅色教堂,望落好有歐式既風格呢,估唔倒係市區入面會有咁令既建築物。(P.S.睇粉紅色教堂係唔洗門票的)

美溪沙灘既日落被譽為全世界第六美喔! 雖然因為去到太晏而睇唔倒傳說中的日落,但係見倒係呢邊既天空真係勁清,而且呢個沙灘既沙係幼到好似面粉咁,唔著拖鞋赤住腳行都唔會痛,絕對係一個相當高汁既沙灘。而且夜晚係呢度吹住海風散步真係好正,記住食完晚餐黎呢度散步消脂喔!

而峴港既巴拿山手掌橋簡直係一個仙境黎,雖然門票拍得住香港既主題樂園價,但我可以話你聽,係絕對值得你去入場體驗。除左有好出名既手掌大橋外,入面仲有有好多好法國既建築物同有個電子遊樂場比你玩(門票已包),所以呢個景點已經足夠我地玩左全日,值回票價哈哈。當然,呢個景點係上到千幾米既山上,會有D凍,因為每高一千米是低六度的,所以出發前記住要帶件外套旁身喔!

門票已經包埋搭欖車上山,所以你可以欣賞下周圍既風景,而且仲有幸比我地見倒瀑布喔!

傳說中既手掌橋,好開心佢將我地放在手心喔哈哈,不過呢度人就真係相對多,如果想同手掌橋自拍,確實是一件難事,所以我地放棄左。

而山上亦有唔少好外國式既建築物,因此被外界稱之為小法國村。而點解呢度既建築物會咁歐陸風呢,原來以前係真係有法國人住係呢度,所以其實呢度有部分既建築物係從以前保存落黎的。唔同人講去左峴港,絕對會被人誤會去左歐洲喔,實在太美了。我地實在係大飽眼福,影相都影到手軟!

對於年頭既呢一個Mindfulness之旅,覺得真係好舒壓,因為你每日既眼前只係一直見倒好平又好味既食物同埋好令人著迷既景色,而且每日幾乎都係食買玩既行程,完全係度假mode! 峴港絕對係一個可以幫你差電既地方。我亦都深信不久既將來,我一定會再次探訪峴港呢個咁特別既地方,黎一個較為深度遊既Mindfulness之旅,比個腦休息下。

分享博客

關於作者

要說點甚麼嗎?

You must be logged inlogged in to post a comment.