聖誕節特別呈獻:節日冷感治癒療程

作者: tiffanypanda
12月 23, 2016

唔記得由幾時開始,我患上咗節日冷感症,越係熱鬧嘅節日我就越唔想出動,人又多又難book枱食飯又塞車又剩,所謂嘅節日氣氛其實可以用一個字去概括,就係:逼。每個節日都只會無間斷煲劇,日劇韓劇都被我煲爆,就去煲動畫,套套都幾百集,就係咁喺二次元空間過咗好多個節日。

11月嚟到希臘,一返到屋企,全屋都已經掛晒聖誕飾物,忍唔住問:“唔駛咁早準備吓嘛?”,佢哋一臉迷惘咁答:“咁都叫早?好快就聖誕喇喎!”或者,我仲未摸清楚佢哋嘅步伐,快同慢,根本係無指標(有時佢哋做嘢慢到爆又反問我咁心急做咩)。

上個星期買咗棵真嘅聖誕樹,我第一次對聖誕節有所期待,因為真嘅聖誕樹好高好靚仲有少少香味!琴晚用咗3個鐘佈置,本來以為好簡單,但原來都好有技巧,輕嘅飾物可以掛高啲,重嘅要掛低啲同掛入啲,如果唔係會整斷枝樹枝,由於屋企有5隻家貓,所以又唔可以掛太低,費事佢哋玩爛啲飾物,擒高擒低又掛又除都咪話唔攰。但一路聽住聖誕歌一路佈置真係好有氣氛,佈置完見到棵樹咁靚好有滿足感。

或者,對我嚟講,以前嘅節日都只係等於幾日假期,但而家我日日放假,節日就變成咗難得嘅活動,由忙裡偷閒變成閒裡偷忙,每件生活上嘅小事都可以變成“最重要的小事”。我而家終於明白點解佢哋望住兩個聖誕波都可以討論同沉思10分鐘先決定掛邊個波,唔係話佢哋太得閒,而係佢哋對小事小物都有一份熱誠,心態決定生活,放低冷感感受同投入身邊嘅事物,學吓慢活可能可以令你更加快活。期待聖誕節。

 

Instagram: tiffanypanda (https://www.instagram.com/tiffanypanda/)

Facebook fan page:My Big Fat Greek Yogurt ·阿里阿德涅·希臘外宿中 (https://www.facebook.com/tiffanypanda05/)

電子郵件: tiffany.ng.5@gmail.com

分享博客

關於作者

要說點甚麼嗎?

You must be logged inlogged in to post a comment.