東京快閃送驚喜之旅

作者: rayz
9月 20, 2018
blog bg

適逄女友生日跟我同月,佢興高采烈提議去個快閃birthday trip,慶祝二人生日,所以立即向公司請假,決定趁機俾個驚喜佢! 至於有何驚喜,稍後開估。

DAY 1

機票於hutchgo 訂了香草航空機票,早一個月先訂,連行李都係$2000左右一個人,算係唔錯! 出發坐凌晨機,好處是放工返屋企食個飯、沖完涼出發機場剛剛好,上機立即開始訓覺,訓醒起身已經人在日本了!

出到市區酒店放低行李,稍為整頓一下,就出去食我的生日午飯了。第一站去森美介紹嘅立食牛扒IKINARI steak いきなりステーキ,可以自選唔同產地嘅牛,例如国產牛 (即日本牛)、美國安格斯牛等,再同店員講大概要幾多gram,佢就會即場切俾你,上磅收錢,再拎去燒!

IMG_8636

登登登登!呢個係我份434g steak,熱辣辣,大大份,都唔駛3000 yen!

IMG_8648

正值秋季,食完飯就去參觀明冶神宮的銀杏大道,兩旁金黃色的銀杏大樹閃閃發光,十分壯觀,加上藍天白雲,不過如果人少啲影相就更靚了!

IMG_8694

IMG_8727

IMG_8665

女友的東京之旅checklist 之中有幸福Pancake 幸せのパンケーキ,原來要大排長龍先食到!於日本餐廳排隊通常都會用留名的方式排隊,我們用片假明寫下英文名字,要比心機留意服務生叫名,足足等了一小時呢。終於食到鬆軟pancake,食到幸福肥!

IMG_8730

DAY 2

第二天一早到築地市場走走,食個新鮮刺生飯 (朋友問點解唔食 Omakase,又係喎!下次再食過!) ,仲周圍邊走邊食 (注意: 日本人覺得邊行邊食野好無禮貌架,所以雖然係「邊走邊食」,記得買完野係企定定食呢)

IMG_8894

再出發到新宿御苑賞楓!新宿御苑就好似維園咁,市區中的一點綠,不過紅葉季節到訪,當然想睇佢「滿江紅」啦!

IMG_8895

仲有唔同嘅庭園賞玫瑰花

IMG_8818

晚上到了澀谷公園睇青の洞窟,臨近聖誕東京有唔少賞燈飾嘅地方,選擇去青の洞窟係因為佢感覺好浪漫,以藍光為主題,情侶散步100分!

IMG_8832

DAY3

出發河口湖!一早(其實都已經中午,哈哈) 出發到新宿高速巴士總站,買個早餐就上巴士,車程大概1小時45分鐘,直達河口湖站。

IMG_9170

今次住的旅館訂了望到富士山的房間,但去到竟然天陰陰睇唔到座山! 女友同我都好失望,但都無辦法啦,趁未食晚飯,唯有散下步好好享受周圍風景。

IMG_8916

沿住湖邊去到「紅葉迴廊」碰碰運氣,不過由於已經12月了,而且河口湖天氣比東京市區凍一截,紅葉都跌得七七八八,周圍亦都一個人都無!

IMG_8904

IMG_8905

回到旅館就係晚飯時間,到餐廳用膳,係12道菜嘅懷石料理,雖然食過更好味嘅,但係呢個都唔錯唔錯俾8分啦!

IMG_8926

IMG_8928

晚飯後稍為休息一下,我地就各自分開去男湯女湯浸溫泉。女友一向都會慢慢浸,而我就打算快快趣浸下,就返房準備更重要嘅事!

IMG_8923

今晚12點就係女友生日,今年嘅生日驚喜,係求婚呀! 由女友提出去呢個birthday trip 開始,我就即刻有呢個念頭,要喺富士山下同佢求婚,而今個trip 我亦一如以往做旅行free rider,咩都比佢plan,不過就係因為咁,我先可以係佢完全估我唔到之下求婚!雖然呢個求婚計劃其實無咩計劃可言,最大挑戰亦都只係唔俾女友喺我行李裡發現戒指 (出發前佢曾經「檢查」過我行李,好在有驚無險!) ,浸完溫泉入到房,就開始rehearse 一下台詞,準備12點拎出介指!

(下刪一千字肉麻求婚過程) 就係咁,簡單二人世界嘅求婚,女友一聲say yes,我就榮升女友的未婚夫啦!而呢個時侯,出露台望望,雖然好凍,但有滿天星星,好啱feel而我地兩個都興奮到訓唔著!

而第二日起身,你估見到咩? 富士山呀!係富士山! 出返黎啦!

IMG_8937

完美嘅天氣配合完美嘅景色,食埋個靚早餐,我地就出發去附近嘅天上山公園,繼續喺富士山下留下我地嘅腳毛!

IMG_9106

IMG_9160

由於回程係夜機,所以即使最尾一日亦有充足時間由河口湖返東京市中心,拎返寄存咗喺車站嘅行李,再出發機場返香港。 4日3晚嘅旅程真係玩到盡,由於頭尾兩日都幾乎有full day,所以去4日感覺去咗6日! 下次希望同大家分享去honeymoon 嘅遊記。

#寫出你遊歷 #hutchgo資助旅費1000蚊

分享博客

關於作者

要說點甚麼嗎?

You must be logged inlogged in to post a comment.